Gwefan llywodraeth y DU

Manteision cadw'n heini

Drwy wneud digon o ymarfer corff, byddwch chi'n sicrhau bod eich cymalau ac organau'ch corff yn gweithio'n effeithiol. Gall ymarfer hefyd helpu i gadw'ch pwysau'n iach a'ch gwarchod rhag dal peswch ac annwyd yn rheolaidd.

Manteision eraill yw bod lefel eich egni'n cynyddu a bod eich ymennydd yn gweithio'n well. Mae gwybod eich bod yn edrych ac yn teimlo'n dda hefyd yn gallu rhoi hwb sylweddol i'ch hunan-hyder.

Faint o ymarfer fydd ei angen arnoch?

Os ydych chi dan 18 oed, dylech geisio gwneud cyfanswm o 60 munud o weithgarwch corfforol bob dydd. Does dim rhaid i chi wneud hynny i gyd ar unwaith, ond mewn pyliau o 10 - 15 munud o leiaf drwy gydol y dydd. Mae hyn yn cynnwys popeth o godi pwysau yn y gampfa i gerdded i fyny'r grisiau yn hytrach na mynd yn y lifft. Y peth pwysig yw bod y gweithgarwch yn cynyddu cyfradd eich calon ac yn gwneud i chi deimlo'n gynhesach.

Os ydych chi dros 18 oed, anelwch at o leiaf 30 munud o ymarfer o leiaf bum niwrnod yr wythnos.

Os ydych chi'n awyddus i ddechrau ymarfer a chael eich hun yn ffit, y syniad gorau yw rhoi cynnig ar amrywiaeth o wahanol weithgareddau corfforol i weld pa rai rydych chi'n eu mwynhau fwyaf. Unwaith i chi benderfynu pa fath o beth rydych chi'n ei hoffi, fe allwch chi gynllunio pa fath o ymarfer rydych chi'n bwriadu ei wneud a pha bryd.

Cyn dechrau

Os ydych chi wedi penderfynu dechrau ar drefn ymarfer, mae'n bwysig mynd i weld eich meddyg i gael archwiliad. Bydd eich meddyg yn gallu'ch cynghori ynghylch faint o ymarfer y dylech chi fod yn ei wneud i ddechrau. Byddan nhw hefyd yn rhoi gwybod i chi a oes gennych unrhyw gyflwr meddygol megis poen yn eich pen-glin neu yn eich cefn, a all gyfyngu ar ba fath o ymarfer y byddwch yn ei wneud.

• Archwiliadau, apwyntiadau ac achosion brys
• Cofrestru gyda meddyg teulu a chael triniaeth gan ddeintydd

Ffitrwydd am ddim

Does dim rhaid mynd i'r gampfa i gadw'n heini - wneith rhai mathau o ymarfer ddim costio dimai i chi, ac fe allwch chi gynnwys y rhan fwyaf ohonyn nhw yn rhan o batrwm eich bywyd prysur, heb orfod dod o hyd i fwy o oriau yn y dydd.

Meddyliwch am:

Chwaraeon tîm

Does dim rhaid i chi gadw'n heini ar eich pen eich hun. Mae chwarae gemau tîm megis pêl-droed, hoci neu bêl-rwyd yn ymarfer ardderchog, ond mae'n aml yn fwy o hwyl am eich bod gyda chriw o ffrindiau.

Mae'n bosib y bydd eich ysgol, eich coleg neu'ch prifysgol yn cynnal sesiynau gyda'r nos, neu efallai yr hoffech chi ymuno â thîm lleol. Mae manylion clybiau lleol i'w gweld ar y we, yn y llyfr ffôn neu yn eich canolfan hamdden agosaf. Gall eich awdurdod lleol roi gwybodaeth i chi hefyd am weithgareddau chwaraeon yn eich ardal.

• Dod o hyd i'ch awdurdod lleol
• Ymweld â gwefan Sport England Opens new window