Gwefan llywodraeth y DU

Ydy'ch plentyn yn defnyddio cyffuriau?

Gall arwyddion defnyddio cyffuriau gynnwys newidiadau mewn ymddangosiad, ffrindiau, diddordebau, arferion bwyta a chysgu, hwyliau a bod yn agored. Ond yn aml mae'r arwyddion hyn yn rhan naturiol o dyfu. Gallai person ifanc nad yw'n defnyddio cyffuriau ddangos yr un newidiadau.

Canfod mwy

Pan fyddwch yn siarad:

• ceisiwch gael y sgwrs pan ydych yn teimlo'n dawel
• mae gwybodaeth yn rhoi grym - ceisiwch wybodaeth ar wefan Talk to Frank neu ffoniwch linell gwybodaeth am gyffuriau Talk to Frank ar 0800 77 66 00
• ceisiwch gael rhywun i'ch helpu - mae'n helpu cael rhywun arall y mae eich plentyn yn hoff ohono ac yn ei barchu yn yr ystafell
• osgowch ofyn 'Pam?' - bydd yn eu gwneud yn amddiffynnol
• peidiwch â chanolbwyntio ar weld bai - mae'r dyfodol yn bwysicach
• mae'n well gwybod y gwir - does dim tystiolaeth fod siarad am gyffuriau'n arwain at gymryd cyffuriau
• rhowch le i'r plentyn - cyfeiriwch y drafodaeth at yr hyn y maent hwy'n mynd trwyddo
• gall rhagdybiaethau fod yn beryglus - gadewch iddynt esbonio yn eu geiriau'u hunain beth sy'n digwydd. Cymerwch yr hyn y maent yn ei ddweud o ddifrif
• gosodwch derfynau clir - mae angen iddynt wybod beth yw eich teimladau chi
• dydyn nhw byth yn rhy ifanc i sgwrsio - ceisiwch eu hannog i sgwrsio, a'u hannog hefyd i ddweud wrthych chi os bydd rhywun yn cynnig cyffuriau iddynt
• plant hŷn: mae cychwyn yn yr ysgol uwchradd yn amser anodd a bregus
• cymerwch eich amser a byddwch yn barod i wrando - byddwch yn amyneddgar, a gwnewch yn siŵr na fydd neb yn tarfu arnoch
• cofiwch y tair C: cysuro, cysuro, cysuro.

Os oes gan eich plentyn broblem cyffuriau mae'n bwysig eu bod yn gwybod y byddwch yno iddynt - o ateb cwestiynau syml i'w helpu drwy amseroedd anodd. Mae'n werth dweud wrthynt eich bod yn ymddiried ynddynt, ond ar yr un pryd dylech allu dangos eich siom os torrir yr ymddiriedaeth honno.

Mae rhagor o wybodaeth ar gael ar wefan Talk to Frank neu drwy ffonio eu llinell gymorth ar 0800 77 66 00. Neu, mae’r daflen yn y ddolen isod: 'All About Drugs - does your child know more than you?' yn darparu gwybodaeth diweddar i rieni a gofalwyr ar yr oblygiadau o gamddefnyddio cyffuriau sy’n seiliedig ar iechyd a’r gyfraith. Hefyd mae’r taflen yn cynnwys ABC o gyffuriau a chyngor ar sut i fynd i’r afael a’r mater gyda’ch plentyn.

Cofiwch, nid yw'r rhan fwyaf o bobl ifanc sy'n rhoi cynnig ar gyffuriau'n troi'n ddefnyddwyr problemus yn ddiweddarach.

• Llwytho taflen: All About Drugs - does your child know more than you? (PDF, 3315K) Opens new window
• Cymorth gyda ffeiliau PDF
• Gwefan Frank Opens new window

Beth mae'r gyfraith yn ei ddweud

Os caiff eich plentyn ei ddal â chyffur rheoledig yn ei feddiant, mae wedi cyflawni trosedd.

Mae llawer o blant a phobl ifanc yn ansicr ynghylch y gyfraith sy'n gysylltiedig â chyffuriau a'r canlyniadau posibl iddynt yn ddiweddarach. Os caiff eich plentyn ei ddal ym meddiant cyffur rheoledig, mae wedi cyflawni trosedd a bydd hyn yn cael ei gofnodi gan yr heddlu. Gallai hyn hefyd atal y person ifanc rhag cael swydd neu yrfa arbennig, ac ymweld â gwledydd eraill.

Ar gyfer trosedd cyntaf, gall eich plentyn dderbyn rhybudd neu rybuddiad ffurfiol. Os ydynt rhwng 10 a 17 oed ac yn cyflawni rhagor o droseddau, gan gynnwys gwerthu neu smyglo cyffuriau, gallant gael eu cyhuddo a'u dwyn gerbron Llys Ieuenctid.

Mae'n werth cofio y gallech chithau fel rhiant fod mewn perygl o dorri'r gyfraith dan rai amgylchiadau, trwy anwybyddu ymddygiad eich plentyn. Os ydych yn gwybod bod eich plentyn yn rhannu cyffuriau anghyfreithlon gyda ffrind yn eich cartref a chithau'n gwneud dim i'w rhwystro, gallech fod yn cyflawni trosedd. Mae caniatáu i rywun 'smygu canabis yn eich cartref yn drosedd hefyd.

Os cymerwch gyffuriau anghyfreithlon oddi ar eich plentyn i'w atal rhag cyflawni trosedd, rhaid ichi naill ai ddinistrio'r cyffuriau neu eu trosglwyddo i'r heddlu cyn gynted ag y bo modd. Trwy fod â'r cyffuriau yn eich meddiant, gallech fod yn cyflawni trosedd hefyd, hyd yn oed os nad oes unrhyw fwriad i'w defnyddio.