Gwefan llywodraeth y DU

Cynhaliaeth Plant

Mae Cynhaliaeth Plant yn gymorth ariannol rheolaidd. Bydd yn cael ei dalu gan riant nad yw'n byw gyda'r teulu i'r rhiant â gofal er mwyn helpu gyda chostau byw bob dydd y plentyn. Fe'i telir fel arfer ar sail incwm y rhiant nad yw'n byw gyda'r teulu, a gellir ei drefnu naill ai drwy'r Asiantaeth Cynnal Plant neu drwy drefniant preifat. Fel rhiant, nid yw eich cyfrifoldeb ariannol dros eich plentyn yn dod i ben os yw eich perthynas gyda'r rhiant arall yn dod i ben.

• Cael mwy o wybodaeth oddi ar wefan Dewisiadau Cynhaliaeth Plant Opens new window

Hawlio cynhaliaeth gan rywun sy'n byw dramor

Mae gan Brydain drefniant gyda dros 100 o wledydd a thiriogaethau dramor sy'n caniatáu i berson sy'n byw mewn un awdurdod hawlio cynhaliaeth gan gyn-bartner sy'n byw mewn awdurdod arall. Am fwy o wybodaeth, ewch i wefan Gorfodaeth Ddwyffordd gyda Gorchmynion Cynhaliaeth (REMO).

• Gwefan REMO Opens new window

Bonws Cynhaliaeth Plant

Efallai fod gennych hawl i gael y Bonws Cynhaliaeth Plant os ydych chi wedi bod yn cael Cynhaliaeth Plant dan hen gynllun yr Asiantaeth Cynnal Plant (a gyfrifwyd cyn 3 Mawrth 2003) a bod eich budd-dal yn dod i ben gan fod eich incwm wedi codi neu oherwydd y byddwch yn gweithio am o leiaf 16 awr yr wythnos.

Premiwm Cynhaliaeth Plant

Nid yw'r Bonws Cynhaliaeth Plant ar gael i bobl sy'n cael Cynhaliaeth Plant dan gynllun newydd yr Asiantaeth Cynnal Plant (a gyfrifwyd ar ôl 3 Mawrth 2003). Os ydych chi'n rhiant sy'n gofalu am eich plentyn a bod rhywun yn eich cartref yn cael Cymhorthdal Incwm neu Lwfans Ceisio Gwaith yn seiliedig ar incwm, bob wythnos, cewch gadw hyd at £10 o unrhyw Gynhaliaeth Plant a delir ar gyfer eich plentyn. Gelwir hyn yn 'Bremiwm Cynhaliaeth Plant'.

Lwfans Ceisio Gwaith

Os ydych chi'n gallu chwilio am waith â thâl amser llawn neu ran-amser fe allech chi gael y Lwfans Ceisio Gwaith. Eich amgylchiadau fydd yn penderfynu a fyddwch chi'n gymwys ai peidio a faint gewch chi. I gael gwybod a ydych yn gymwys, cliciwch ar y ddolen isod.

• Mwy am y Lwfans Ceisio Gwaith (adran arian, treth a budd-daliadau)

Lwfans Cyflogaeth a Chymorth

Os nad ydych chi'n gallu gweithio oherwydd cyflwr iechyd neu anabledd efallai y bydd modd i chi gael Lwfans Cyflogaeth a Chymorth. Mae'r Lwfans Cyflogaeth a Chymorth yn cynnig cymorth personol ac ariannol i chi fel y gallwch weithio os ydych chi'n gallu. Os na allwch chi weithio oherwydd salwch neu anabledd, cewch elfen cymorth yn ogystal â'r gyfradd sylfaenol.

• Cael gwybod mwy am y Lwfans Cyflogaeth a Chymorth (adran pobl anabl)

Cymhorthdal Incwm

Os nad oes modd i chi weithio'n amser llawn ac os nad oes gennych chi ddigon o arian i fyw arno, mae'n bosib y gallwch chi gael budd-dal Cymhorthdal Incwm. Eich amgylchiadau fydd yn penderfynu a fyddwch chi'n gymwys ai peidio a faint gewch chi. I gael gwybod os ydych yn gymwys ac i wneud cais ar-lein, cliciwch ar y ddolen isod.

• Mwy am Gymhorthdal Incwm

Credyd Mewn Gwaith

Taliad di-dreth o £40 i rieni unigol (£60 i rieni yn Llundain) yw'r Credyd Mewn Gwaith. Fe'i telir i rieni unigol sydd wedi hawlio budd-daliadau am flwyddyn neu fwy ac yn mynd yn ôl i weithio am o leiaf 16 awr yr wythnos. Telir Credyd Gwaith am flwyddyn ar ben budd-daliadau gwaith eraill. I gael gwybod mwy, holwch rywun yn eich swyddfa Canolfan Byd Gwaith leol.

• Dod o hyd i'ch swyddfa Canolfan Byd Gwaith leol Opens new window

Costau gofal plant

Gall y Ganolfan Byd Gwaith helpu gyda chostau gofal plant ar yr amod y bydd eich plentyn yn cael ei warchod gan ddarparwr gofal plant cofrestredig a'ch bod yn gwneud rhywbeth sy'n gysylltiedig â'r yrfa yr ydych wedi'i dewis, fel y cytunwyd gyda'r Ganolfan Byd Gwaith. Unwaith y byddwch yn gweithio, mae'n bosib y byddwch yn gymwys ar gyfer Credyd Treth Gwaith, a allai eich galluogi i hawlio'n ôl hyd at 80 y cant o'ch costau gofal plant cymwys.

Grant Swydd

Un taliad di-dreth yw'r Grant Swydd. Gallwch gael y taliad hwn pan fyddwch chi'n dechrau gweithio am o leiaf 16 awr yr wythnos ac yn stopio cael budd-daliadau. Efallai y bydd gennych hawl i gael Grant Swydd os byddwch yn dechrau gweithio am o leiaf 16 awr yr wythnos, os nad oes gennych bartner sy'n gweithio 16 awr neu fwy yr wythnos a'ch bod yn disgwyl i'ch gwaith bara am bum wythnos o leiaf. Rhaid eich bod hefyd wedi hawlio un o'r budd-daliadau canlynol am 26 wythnos o leiaf cyn dechrau ar eich swydd newydd:

• Lwfans Ceisio Gwaith
  
• Cymhorthdal Incwm
  
• Lwfans Cyflogaeth a Chymorth
• Budd-dal Analluogrwydd
  
• Lwfans Anabledd Difrifol
  
• Taliadau Lwfans y Fargen Newydd/Ychwanegol lle mae'r lwfans yn seiliedig ar y Lwfans Ceisio Gwaith, Cymhorthdal Incwm, Budd-dal Analluogrwydd neu'r Lwfans Anabledd Difrifol
  
• Taliadau Ardal Gyflogaeth lle mae'r lwfans yn seiliedig ar y Lwfans Ceisio Gwaith

• Rhagor o wybodaeth am Grant Swydd a chyngor ar sut i hawlio (adran arian, treth a budd-daliadau)

Chwilio am waith, gofal plant a chyngor ariannol

Mae'r Ganolfan Byd Gwaith wedi creu Pecyn Dewisiadau ar gyfer rhieni unigol sy'n ystyried gweithio. Mae'n cynnwys cyngor ar chwilio am waith, gofal plant a chymorth ariannol. Gallwch archebu un drwy ffonio 0800 085 5701.

• Budd-daliadau plant a chymorth ar gyfer rhieni sy'n mynd yn ôl i weithio