Gwefan llywodraeth y DU

Gwybodaeth am yr MOT

Mae angen y prawf cyntaf unwaith y bydd cerbyd yn dair oed. Mae rheolau gwahanol os byddwch chi'n ei ddefnyddio fel tacsi. Pan gaiff eich cerbyd ei brofi, mae'r MOT yn archwilio rhai eitemau pwysig i weld a ydynt yn bodloni'r gofynion cyfreithiol. Dylech fod yn ymwybodol nad yw tystysgrif MOT yn warant o gyflwr mecanyddol cyffredinol cerbyd.

Pryd fydd angen profi eich cerbyd

Os yw cerbyd wedi'i gofrestru ond erioed wedi'i ddefnyddio ar y ffordd, bydd angen MOT dair blynedd wedi'r dyddiad cofrestru. Er enghraifft, byddai'n rhaid i gerbyd a gofrestrwyd 'yn newydd' ar 1 Ebrill 2004 gael ei brawf MOT erbyn 1 Ebrill 2007 fan hwyraf.

Os caiff cerbyd ei ddefnyddio cyn ei gofrestru, fel yn achos cerbyd sy'n cael ei fewnforio, bydd angen MOT dair blynedd ar ôl diwedd blwyddyn ei wneuthuriad. Er enghraifft, byddai'n rhaid i gerbyd a adeiladwyd unrhyw bryd yn ystod 2004 gael MOT erbyn 31 Rhagfyr 2007 fan hwyraf. Ni roddir cyfnod o ras ar ôl y dyddiadau hyn.

Gellir cynnal MOT unrhyw bryd

Os caiff y cerbyd ei brofi o fewn y mis calendr cyn y dyddiad olaf ar gyfer MOT, bydd y dystysgrif yn ddilys o ddyddiad y prawf am flwyddyn ar ôl y dyddiad pan ddaw'r dystysgrif gyfredol i ben. Er enghraifft os yw'r dystysgrif gyfredol i ddod i ben ar 1 Ebrill 2007, a'r cerbyd yn cael ei brofi ar 2 Mawrth 2007 neu wedi hynny, bydd y dystysgrif yn ddilys o ddiwrnod y prawf tan 1 Ebrill 2008.

Byddai'r un rheol hefyd yn berthnasol pe bai'r cerbyd yn cael ei brofi o fewn mis calendr i'w MOT cyntaf. Yn yr achos hwn, byddai'n rhaid i berchennog y cerbyd gyflwyno eu dogfen gofrestru.

Os yw'r cerbyd yn cael ei brofi fis neu fwy cyn y dyddiad y daw i ben, dim ond am ddeuddeg mis y bydd yr MOT yn ddilys.