Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Arian, treth a budd-daliadau

Arian, treth a budd-daliadau

Treth ar werthu cyfranddaliadau

Os bydd cyfanswm eich enillion (elw) uwchben lefel arbennig pan fyddwch yn cael gwared ar asedau, gan gynnwys cyfranddaliadau, efallai y bydd yn rhaid ichi dalu Treth Enillion Cyfalaf (TEC). Mae rheolau arbennig yn berthnasol ar gyfer pennu cyfranddaliadau a brynwyd yn yr un cwmni ar adegau gwahanol - i sicrhau eich bod yn cyfrifo'r golled neu'r elw cywir.

Canfod a oes raid ichi dalu TEC

Bydd yr angen i dalu TEC neu beidio pan fyddwch yn cael gwared ar gyfranddaliadau'n dibynnu ar gyfanswm eich enillion am y flwyddyn dreth. Mae hwn yn cynnwys yr elw ar y cyfranddaliadau a'r elw ar gael gwared ar unrhyw asedau eraill sy'n denu TEC.

Codir TEC ar gyfanswm yr enillion ar ôl:

  • didynnu costau prynu a chael gwared ar bob ased
  • rhoi cyfrif am unrhyw ostyngiadau sy'n effeithio ar faint yr enillion - mae rhai'n cael eu rhoi'n awtomatig, mae rhaid hawlio eraill
  • didynnu'r colledion a ganiateir sy'n codi o gael gwared ar asedau neu gyfranddaliadau eraill
  • gweithredu'r 'gostyngiad meinhau' (taper relief) - gall hwn leihau'r enillion trethadwy ar ased, yn ddibynnol ar natur yr ased ac ers pryd yr ydych wedi bod yn berchen arno
  • didynnu o gyfanswm yr enillion trethadwy sydd ar ôl y 'swm eithriedig blynyddol' - mae hwn yn £9,600 ar gyfer blwyddyn dreth 2008-09

Faint o Dreth Enillion Cyfalaf fyddwch chi'n ei thalu?

Mae hyn yn dibynnu ar eich incwm cyffredinol.

I gael gwybod sut i gyfrifo TEC, gan gynnwys enghreifftiau ac i weld ar ba asedau eraill y mae'n rhaid talu TEC, darllenwch ein herthygl gysylltiedig.

Rheolau arbennig ar gyfer cyfrifo enillion ar gyfranddaliadau

Mae cyfranddaliadau'n wahanol i'r rhan fwyaf o asedau eraill sy'n denu TEC oherwydd nad oes modd adnabod pob cyfranddaliad yn unigol. Efallai y byddwch yn prynu cyfranddaliadau o'r un dosbarth mewn un cwmni ar wahanol adegau ac am wahanol brisiau. O ganlyniad, rhaid ichi ddefnyddio rheolau arbennig ar gyfer cyfrifo eu cost caffael at ddibenion TEC.

Cyfranddaliadau trwy gynllun cyfranddaliadau gweithwyr

Mae rheolau TEC arbennig ar gyfer cyfranddaliadau sy'n cael eu prynu neu eu derbyn trwy gynllun cyfranddaliadau gweithwyr. Mae cynlluniau cymeradwy Cyllid a Thollau EM, megis Cynlluniau Cymhellion Cyfranddaliadau, cynlluniau Cynilo Wrth Ennill cymeradwy, Cynlluniau Opsiwn i Brynu Cyfranddaliadau mewn Cwmni a Chymhellion Rheoli Mentrau yn cynnig manteision treth.

Os dilynwch y rheolau, efallai na fyddwch yn talu TEC neu'n talu llai pan fyddwch yn gwerthu'r cyfranddaliadau.

Rhoi gwybod pan fyddwch yn gwerthu cyfranddaliadau a thalu TEC

Os ydych yn llenwi ffurflen dreth fel arfer

Os ydych yn llenwi ffurflen dreth Hunasesiad fel arfer

  • mae TEC yn daladwy
  • rydych am hawlio gostyngiad neu golled a ganiateir neu wneud dewisiad (election)
  • bod cyfanswm gwerth yr holl asedau a waredwyd gennych sy'n denu TEC yn fwy na phedair gwaith y Swm Eithriedig Blynyddol - pa un a wnaethoch enillion neu beidio
  • rydych yn didynnu colledion a bod eich enillion cyn didynnu colledion a defnyddio'r gostyngiad meinhau yn fwy na'r Swm Eithriedig Blynyddol
  • dim colledion wedi'i didynnu, ond bod yr enillion ar ôl y gostyngiad meinhau yn fwy na'r Swm Eithriedig Blynyddol

Os na ddywedwch wrth eich Swyddfa Dreth am enillion y dylid eu cynnwys ar eich ffurflen dreth, efallai y byddwch yn wynebu cosbau ariannol a/neu achos llys.

Archebu'r tudalennau TEC

  • os ydych yn llenwi'r ffurflen dreth bapur lawn, gallwch lwytho'r tudalennau oddi ar wefan Cyllid a Thollau EM neu ddefnyddio'r gwasanaeth archebu ar-lein - gweler 'Mwy o ddolenni defnyddiol'
  • os ydych yn llenwi'r ffurflen dreth bapur fer, gofynnwch i'ch Swyddfa Dreth am ffurflen SA200CG neu ddefnyddio'r gwasanaeth archebu ar-lein - gweler 'Mwy o ddolenni defnyddiol'
  • nid yw'r tudalennau TEC ar gael ar hyn o bryd gyda meddalwedd Hunanasesu Ar-lein Cyllid a Thollau EM - bydd angen ichi lenwi ffurflen dreth bapur
  • os ydych yn defnyddio meddalwedd masnachol efallai bod y tudalennau ar gael

Os nad ydych yn llenwi ffurflen dreth fel arfer ond bod Treth Enillion Cyfalaf yn daladwy

  • ysgrifennwch at eich Swyddfa Dreth gan ddarparu eich cyfrifiadau TEC - efallai yr anfonant fil atoch, neu ofyn ichi lenwi ffurflen dreth
  • os na ddywedwch wrth eich Swyddfa Dreth fod arnoch chi dreth enillion cyfalaf o fewn chwe mis ar ôl diwedd y flwyddyn dreth, efallai y bydd yn rhaid ichi dalu cosb

Gwerthu neu roi cyfranddaliadau i'ch partner priod, i'ch partner sifil neu i'ch plant

Does dim rhaid ichi dalu TEC os ydych yn gwerthu neu'n rhoi cyfranddaliadau i'ch partner priod a chithau'n briod yn gyfreithlon neu mewn partneriaeth sifil ac yn byw gyda'ch gilydd. Ond os ydynt hwy'n rhoi neu'n gwerthu'r cyfranddaliadau'n ddiweddarach, efallai y bydd yn rhaid iddynt dalu TEC ar yr elw - yn seiliedig ar yr hyn y taloch chi amdanynt yn wreiddiol.

Does dim gostyngiad arbennig os ydych yn gwerthu neu'n rhoi cyfranddaliadau i'ch plant.

Rhoi neu werthu cyfranddaliadau am bris llai na'u gwerth

Os ydych yn rhoi cyfranddaliadau i ffwrdd - fel nad ydych yn cael dim byd amdanynt - mae eich enillion yn seiliedig ar eu gwerth. Mae'r un peth yn wir pan fyddwch yn eu gwerthu am lai na'u gwerth llawn. Felly mae'n rhaid ichi gyfrifo'r enillion yn seiliedig ar werth llawn y cyfranddaliadau pan roesoch hwy i ffwrdd.

Mwy o ddolenni defnyddiol

Yn yr adran hon...

Allweddumynediad llywodraeth y DU