Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Arian, treth a budd-daliadau

Arian, treth a budd-daliadau

A oes angen i chi lenwi ffurflen dreth?

Os yw eich materion treth yn gymharol syml a'ch bod eisoes yn talu treth drwy Dalu Wrth Ennill (PAYE) mae'n debyg na fydd angen i chi lenwi ffurflen dreth. Ond os yw eich materion treth yn fwy cymhleth - neu os byddwch yn cael incwm o sawl ffynhonnell - efallai y bydd yn rhaid i chi lenwi ffurflen dreth.

Pwy sy'n gorfod llenwi ffurflen dreth?

  • pobl hunangyflogedig (gan gynnwys aelodau o bartneriaeth)
  • cyfarwyddwyr cwmni (ac eithrio mudiadau di-elw)
  • gweinidogion yr efengyl (unrhyw ffydd)
  • pobl sy'n cael rhent neu incwm o dir ac eiddo yn y DU (ond os ydych yn gyflogai a'r incwm hwn yn llai na £2,500 y flwyddyn, efallai na fydd angen llenwi ffurflen dreth)
  • pobl gydag incwm di-dreth arall ac nad oes modd casglu'r dreth sy'n daladwy arno drwy god treth Talu Wrth Ennill
  • pobl gydag incwm tramor trethadwy, hyd yn oed os nad ydynt yn preswylio'n arferol yn y DU (mae hyn yn cynnwys landlordiaid di-breswyl)
  • unrhyw un sy'n derbyn (neu y gellir ei drin fel person sy'n derbyn) incwm yn flynyddol gan ymddiriedolaeth neu setliad, neu unrhyw incwm o ystad person ymadawedig, a bod rhagor o dreth i'w thalu ar yr incwm hwnnw
  • ymddiriedolwyr a chynrychiolwyr personol (gan gynnwys pobl sy'n rheoli materion ariannol pobl sydd wedi marw)
  • ymddiriedolwyr rhai cynlluniau pensiwn
  • enwau neu aelodau Lloyd's
  • gweithwyr a phensiynwyr gyda materion treth mwy cymhleth - gweler isod

Cofiwch, os oes gennych chi unrhyw incwm nad yw'n cael ei drethu yn y ffynhonnell, er enghraifft, rhenti neu enillion llawrydd, efallai y bydd yn rhaid i chi lenwi ffurflen dreth.

Gweithwyr a phensiynwyr gyda materion treth mwy cymhleth

Bydd angen i chi lenwi ffurflen dreth:

  • os oes gennych chi incwm blynyddol o £100,000 neu ragor
  • os oes gennych chi incwm blynyddol o gynilion neu fuddsoddiadau o £10,000 neu fwy (cyn treth)
  • os byddwch yn hawlio yn erbyn treth am dreuliau neu danysgrifiadau proffesiynol o £2,500 neu fwy
  • os oes gennych incwm di-dreth o £2,500 neu fwy (er y bydd rhai pensiynwyr o bosibl yn gallu talu'r dreth ar hwn drwy eu cod treth Talu Wrth Ennill)
  • os oes arnoch chi dreth ar ddiwedd y flwyddyn nad oes modd ei chasglu drwy newid eich cod treth Talu Wrth Ennill ar gyfer y flwyddyn ddilynol

Os ydych yn 65 oed neu'n hŷn, efallai y bydd Cyllid a Thollau Ei Mawrhydi yn gofyn i chi lenwi ffurflen dreth er mwyn iddynt allu cyfrifo faint o Lwfans Personol uwch neu Lwfans Pâr Priod y dylech ei gael.

Mathau o ffurflenni treth

Ceir gwahanol fathau o ffurflenni a thudalennau atodol ar gyfer gwahanol ffurflenni treth - er enghraifft, ceir ffurflenni ar gyfer unigolion a chyfarwyddwyr, partneriaethau ac ymddiriedolaethau. Bydd y ffurflen a'r tudalennau atodol y mae'n bosib y bydd angen i chi eu llenwi yn dibynnu ar eich amgylchiadau.

Newidiadau a allai olygu y bydd yn rhaid i chi lenwi ffurflen

Dyma rai newidiadau arferol a allai olygu y bydd angen i chi lenwi ffurflen dreth am y tro cyntaf fel unigolyn:

  • cynnydd sylweddol mewn incwm/ffortiwn annisgwyl/etifeddiaeth sylweddol
  • gwerthu ail eiddo
  • gwerthu cyfranddaliadau
  • rhoi arian, buddsoddiadau neu eiddo

Os yw'n debygol y bydd angen i chi dalu Treth Enillion Cyfalaf am flwyddyn dreth ac nad ydych wedi cael rhybudd i lenwi ffurflen dreth ar gyfer y flwyddyn honno dylech ofyn am un (gweler 'Sut i gael ffurflen dreth' isod).

Dylech ddweud wrth Gyllid a Thollau EM erbyn 5 Hydref ar ôl y flwyddyn dreth er mwyn osgoi cosb am fethu rhoi gwybod ei bod yn bosibl bod angen i chi dalu Treth Enillion Cyfalaf. (Gweler 'Enillion cyfalaf a ffurflenni treth' isod).

Enillion cyfalaf a ffurflenni treth

Os ydych wedi cael rhybudd i lenwi ffurflen dreth ar gyfer 2007/08 bydd angen i chi lenwi'r tudalennau Crynodeb Enillion Cyfalaf, os yw'r canlynol yn wir am y flwyddyn dreth honno:

  • cawsoch wared ar asedau trethadwy a oedd yn werth mwy na £36,800
  • tynnir colledion o'ch enillion trethadwy, ac mae eich enillion trethadwy cyn colledion a gostyngiad meinhau (taper relief) yn fwy na £9,200
  • nid oes colledion yn cael eu tynnu ac mae eich enillion trethadwy ar ôl gostyngiad meinhau yn fwy na £9,200
  • mae arnoch eisiau hawlio colledion cyfalaf a ganiateir neu wneud unrhyw etholiad neu hawliad enillion cyfalaf arall ar gyfer y flwyddyn

Wrth gyfrifo a oedd yr asedau a wariwyd yn werth mwy na £36,800 dylech ddefnyddio gwerth marchnad unrhyw asedau a roddwyd neu a werthwyd gennych am lai na'u gwerth llawn ac anwybyddu'r canlynol:

  • asedau eithriedig a waredwyd megis ceir preifat, cyfranddaliadau mewn Cynlluniau Ecwiti Personol (PEPs) neu Gyfrifon Cynilo Unigol (ISAs)
  • asedau a roddwyd i'ch priod neu'ch partner sifil (os oeddech chi'n byw gyda'ch gilydd ryw bryd yn ystod y flwyddyn dreth)

cael gwared ar eich cartref eich hun os yw'r canlynol yn wir:

  • hwn fu eich unig gartref yn ystod eich perchnogaeth ac ni chafodd ei ddefnyddio at unrhyw ddibenion eraill, er enghraifft, yn eich busnes
  • mae'r tŷ wedi cael ei ddefnyddio fel eich cartref drwy gydol eich perchnogaeth (ond gallwch anwybyddu tair blynedd diwethaf y berchnogaeth) - nid oedd y gerddi y cafwyd gwared arnynt ar yr un pryd yn fwy na hanner hectar

Wrth gyfrifo eich cyfanswm, bydd eich enillion trethadwy yn cynnwys unrhyw enillion a briodolwyd i chi (er enghraifft, oherwydd eich bod yn setlwr neu'n fuddiolwr ymddiriedolaeth, neu mewn rhai achosion lle rydych yn aelod o gwmni di-breswyl).

Os nad ydych â'ch domisil yn y DU ac y gellir eich trethu ar sail taliadau, wrth nodi'r terfynau uwch yng nghyswllt asedau tramor, dylech gynnwys yr enillion a ddaeth yn ôl i'r DU yn y flwyddyn dreth.

Sut i gael ffurflen dreth

Os nad ydych wedi derbyn ffurflen dreth ond yn teimlo y dylech fod yn llenwi un, cysylltwch â'ch Swyddfa Dreth. Cewch y manylion gan eich cyflogwr neu'ch darparwr pensiwn, neu gallwch chwilio ar-lein.

Gallwch ofyn am ffurflen dreth unrhyw bryd - er enghraifft, os ydych eisiau hawlio gostyngiad neu eithriad treth neilltuol. Yn dibynnu ar eich amgylchiadau, efallai yr anfonir ffurflen dreth bedair tudalen fer atoch, neu ffurflen lawn. Gallwch lenwi'r ffurflen dreth lawn ar-lein.

Os ydych yn derbyn ffurflen dreth, a oes angen ichi ei llenwi?

Oes - hyd yn oed os ydych yn talu'ch holl dreth drwy TWE. Mae rhesymau eraill weithiau dros roi ffurflen dreth, er enghraifft i ganfod a yw'r dreth gywir wedi'i thalu'n gyffredinol. Felly, os byddwch yn derbyn ffurflen dreth, rhaid ichi ei llenwi a'i dychwelyd hyd yn oed os ydych o'r farn nad oes rhagor o dreth i'w thalu.

Manteision ffeilio ar-lein

Gallwch arbed amser a gwaith papur drwy ffeilio eich ffurflen dreth ar-lein. Fe gewch gydnabyddiaeth awtomatig, a chewch hefyd ganfod faint sy'n ddyledus gennych neu faint sy'n ddyledus i chi yn syth gan fod y ffigurau'n cael eu cyfrifo ar unwaith. Dilynwch y ddolen isod i gael gwybod mwy.

Yn yr adran hon...

Additional links

Allweddumynediad llywodraeth y DU