Gwefan llywodraeth y DU

Anfon ffurflenni treth Hunanasesu

Yn fuan ar ôl blwyddyn dreth newydd (6 Ebrill) bydd Cyllid a Thollau EM yn anfon Rhybudd i Gwblhau Ffurflen Dreth ar gyfer y flwyddyn dreth flaenorol i bawb y mae'n ofynnol iddynt gwblhau un, cyn belled ag y gŵyr Cyllid a Thollau EM. Os byddwch chi'n llenwi'ch ffurflen ar bapur, y Rhybudd Ffeilio yw'r ffurflen dreth bapur ei hun.

Os byddwch chi'n ei wneud ar-lein fel arfer, bydd llythyr yn cael ei anfon atoch (sef y 'Rhybudd Ffeilio') yn dweud wrthych am wneud hynny ar-lein.

• Mwy am y rhai y mae angen iddynt lenwi ffurflen dreth

Ffurflenni treth - dyddiadau cau a dirwyon am eu dychwelyd yn hwyr

31 Hydref: Ffurflenni papur

Os anfonir rhybudd atoch y dylech gwblhau Ffurflen Dreth cyn neu ar 31 Gorffennaf a'ch bod yn dymuno anfon ffurflen bapur, rhaid i chi ddychwelyd y ffurflen, wedi'i chwblhau, at Gyllid a Thollau EM erbyn 31 Hydref. Os anfonir rhybudd atoch y dylech gwblhau ffurflen dreth ar ôl 31 Gorffennaf, rhaid i chi ddychwelyd y ffurflen dreth bapur, wedi'i chwblhau erbyn 31 Hydref neu dri mis ar ôl y dyddiad y cyhoeddwyd y rhybudd, p'un bynnag yw'r hwyraf o'r ddau.

Yn achos ffurflenni papur sy'n cyrraedd Cyllid a Thollau EM erbyn y dyddiad hwn byddant:

• yn cyfrifo'ch treth ar eich cyfer (er y gallwch ei gyfrifo drosoch eich hun os dymunwch wneud hynny)
• yn dweud wrthych beth i'w dalu erbyn y 31 Ionawr dilynol
• yn casglu treth drwy eich cod treth (os yw'n bosibl) pan fydd arnoch chi lai na £2,000 oni bai eich bod yn dweud fel arall wrthynt

Os bydd y ffurflen bapur yn cyrraedd ar ôl y dyddiad cau hwn, byddwch yn gorfod talu dirwy o £100 fel mater o drefn.

(Mae ffurflenni Partneriaeth hwyr yn golygu dirwy o £100 i bob partner. Mae ffurflenni Ymddiriedolaeth a ffurflenni Ystâd hwyr yn golygu dirwy o £100 i'r ymddiriedolaeth neu'r ystâd).

(Mae rhai achosion prin iawn pan na ellir llenwi ffurflen ar-lein. Yn yr achosion hyn y dyddiad cau pan mae'n rhaid i'r ffurflen gyrraedd Cyllid a Thollau EM yw 31 Ionawr. Gweler 'Dyddiadau cau ar gyfer ffurflenni treth na ellir eu gyrru ar-lein' isod).

30 Rhagfyr: Ffurflenni ar-lein (ar gyfer treth a gesglir drwy'ch cod treth)

Os byddwch yn anfon eich ffurflen dreth at Gyllid a Thollau EM ar-lein, rhaid ichi ei dychwelyd erbyn y dyddiad hwn os ydych eisiau i Gyllid a Thollau EM gasglu'r dreth drwy eich cod treth (os yw hynny'n bosibl) pan fydd arnoch chi lai na £2,000. Fel arall, gallwch ei gyrru hyd at 31 Ionawr.

31 Ionawr: Ffurflenni ar-lein

Pan gyhoeddir rhybudd i gwblhau ffurflen dreth cyn 31 Hydref dyma'r dyddiad cau ar gyfer dychwelyd ffurflen dreth ar-lein. Pan gyhoeddir rhybudd i ffeilio ffurflen dreth ar ôl 31 Hydref y dyddiad cau ar gyfer ei dychwelyd yw tri mis yn dilyn dyddiad cyhoeddi'r rhybudd. Os bydd y ffurflen yn cyrraedd ar ôl y dyddiad cau hwn, byddwch yn gorfod talu dirwy o £100 fel mater o drefn.

(Y dyddiad hwn hefyd yw'r dyddiad cau ar gyfer ffurflenni papur pan nad yw'n bosib ffeilio'r ffurflen ar-lein. Gweler 'Dyddiadau cau ar gyfer ffurflenni treth na ellir eu gyrru ar-lein' isod).

(Mae ffurflenni Partneriaeth hwyr yn golygu dirwy o £100 i bob partner. Mae ffurflenni Ymddiriedolaeth a ffurflenni Ystâd hwyr yn golygu dirwy o £100 i'r ymddiriedolaeth neu'r ystâd).

Ffurflenni treth a dderbynnir ar ôl 31 Hydref

Os bu i chi dderbyn eich ffurflen dreth (neu Rybudd ffeilio os ydych chi'n ffeilio ar-lein) ar ôl 31 Hydref, rhaid i chi ei chwblhau a'i dychwelyd i Gyllid a Thollau EM o fewn tri mis i'r dyddiad pan dderbynwyd y ffurflen. Fel rheol mae gennych 30 diwrnod o'r dyddiad ar y cais am daliad (sef y 'Datganiad ar gyfer Hunanasesu').

Os ydych chi'n credu bod y taliadau a ofynnir yn rhy uchel

Bydd gofyn i chi wneud dau 'daliad ar gyfrif' ar gyfer y flwyddyn dreth gyfredol os yw cyfanswm y dreth a oedd yn ddyledus yn y flwyddyn dreth flaenorol yn llai na 80 y cant o'r dreth a ddidynnwyd yn y ffynhonnell drwy'r system Talu Wrth Ennill a bod eich bil treth Hunanasesu ar gyfer y flwyddyn dreth flaenorol dros £500 (£1000 o 6 Ebrill 2009 - blwyddyn dreth 2009-10). Mae pob taliad ar gyfrif yn hafal i hanner treth ddyledus y flwyddyn flaenorol.

Os ydych chi'n disgwyl y bydd eich incwm am y flwyddyn gyfredol yn wahanol iawn i'r flwyddyn flaenorol, gallwch ofyn am addasu'r taliadau hyn.

• Deall eich Datganiad Hunanasesu

Dyddiadau cau ar gyfer ffurflenni treth na ellir eu gyrru ar-lein

Prin iawn yw'r achosion pan fyddwch yn methu llenwi ffurflen dreth ar-lein - er enghraifft os byddwch yn llenwi ffurflen landlord cwmni dibreswyl. Mewn achosion o'r fath, rhaid anfon y ffurflen dreth bapur i Gyllid a Thollau EM erbyn 31 Ionawr neu dri mis ar ôl y dyddiad yr anfonwyd y ffurflen dreth atoch, p'un bynnag yw'r hwyraf.

• Cael gwybod rhagor am ffurflenni y gellir eu llenwi ar-lein, a'r rhai na ellir eu llenwi ar-lein

Ffurflenni hwyr a cheisiadau am daliadau

Os bydd eich ffurflen dreth yn hwyr a bod Cyllid a Thollau EM yn credu nad ydych wedi talu digon o dreth mewn pryd, gallant amcangyfrif faint o dreth y dylech ei thalu yn eu golwg. Gelwir hyn yn 'ddyfarniad' o'r dreth sy'n ddyledus.

Dim ond wrth anfon ffurflen dreth wedi'i chwblhau y gallwch ddiweddaru'r dyfarniad hwn. Efallai hefyd y bydd rhaid i chi dalu dirwyon a thaliadau ychwanegol.

• Apelio yn erbyn penderfyniadau Cyllid a Thollau EM
• Sut i weithredu ar ran trethdalwr arall