Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Arian, treth a budd-daliadau

Arian, treth a budd-daliadau

Newid i amgylchiadau'r teulu neu incwm

Os ydych chi'n derbyn credydau treth, mae'n bwysig dweud wrth Gyllid a Thollau EM os bydd eich amgylchiadau'n newid. Os na wnewch chi hyn, mae'n bosibl na chewch chi'r holl arian y mae gennych hawl iddo, neu os telir gormod i chi - efallai y bydd rhaid i chi dalu rhywfaint yn ôl.

Bydd faint o gredyd treth gewch chi'n dibynnu'n bennaf ar incwm eich cartref a'r bobl yn eich teulu, felly mae sawl math o newid y mae'n rhaid i chi roi gwybod i Gyllid a Thollau EM amdanyn nhw.

Newidiadau yn eich teulu

Dywedwch wrth Gyllid a Thollau EM:

  • os byddwch chi'n priodi, yn cofrestru fel partneriaid sifil neu'n dechrau byw gyda phartner
  • os byddwch chi'n ysgaru, yn terfynu eich partneriaeth sifil neu'n gwahanu oddi wrth eich partner
  • os cewch chi fabi neu fod plentyn arall yn dod i fyw gyda chi
  • os bydd un o'ch plant yn gadael ac yn mynd i fyw gyda rhywun arall
  • os bydd eich partner neu un o'ch plant yn marw

Newidiadau yn addysg eich plentyn

Dywedwch wrth Gyllid a Thollau EM:

  • os bydd unrhyw blentyn rydych chi'n gofalu amdano/i yn aros mewn addysg amser llawn nad yw'n addysg uwch neu hyfforddiant cymeradwy ar ôl 1 Medi yn dilyn eu pen-blwydd yn 16 oed (maen nhw'n cael eu cyfrif yn bobl ifanc at ddibenion credyd treth ar ôl hyn)
  • os bydd unrhyw berson ifanc rydych chi'n gofalu amdano/i yn gadael addysg amser llawn nad yw'n addysg uwch neu hyfforddiant cymeradwy cyn iddyn nhw fod yn 20 oed
  • os bydd unrhyw berson ifanc rydych chi'n gofalu amdano/i yn gadael addysg amser llawn nad yw'n addysg uwch neu hyfforddiant cymeradwy cyn cyrraedd 19 oed ond yn cofrestru gyda'r Gwasanaeth Gyrfaoedd, y gwasanaeth Connexions, neu wasanaeth tebyg

Newidiadau i gostau gofal plant

Dywedwch wrth Gyllid a Thollau EM:

  • os byddwch chi'n dechrau neu'n rhoi'r gorau i dalu am ddarparwr gofal plant cymeradwy
  • os ydych chi'n cael help gyda chostau gofal plant drwy gyfrwng y Credyd Treth Gwaith a bod y gost wythnosol ar gyfartaledd yn codi neu'n gostwng £10 yr wythnos neu fwy, am o leiaf bedair wythnos o'r bron

Newidiadau i iechyd eich teulu

Dywedwch wrth Gyllid a Thollau EM:

  • os ydych chi neu'ch partner yn mynd yn anabl neu'n ddifrifol anabl neu'n peidio â bod yn anabl
  • os ydy plentyn neu berson ifanc rydych chi'n gofalu amdanynt yn mynd yn anabl neu'n ddifrifol anabl neu'n peidio â bod yn anabl

Newidiadau i'ch incwm

Gan fod faint o gredyd treth gewch chi'n dibynnu'n bennaf ar eich incwm blynyddol (neu ar eich incwm ar y cyd os ydych chi'n rhan o gwpwl), dylech roi gwybod i Gyllid a Thollau EM am y newidiadau i'ch incwm.

Os ydych chi'n disgwyl y bydd eich incwm am y flwyddyn yn llai na'ch incwm yn y flwyddyn flaenorol, mae'n bosib y bydd gennych yr hawl i arian ychwanegol.

Os ydych chi'n disgwyl y bydd eich incwm am y flwyddyn yn fwy na £25,000 yn uwch na'ch incwm yn y flwyddyn flaenorol, mae'n bosib y cewch chi lai o gredyd treth. Os cewch chi ormod o gredyd treth, mae'n bosib y bydd rhaid i chi dalu rhywfaint yn ôl.

Ond, os ydych chi'n disgwyl i'ch incwm codi £25,000 neu lai, does dim rhaid i chi ddweud wrth yr adran oherwydd chaiff hynny ddim effaith ar faint o gredyd treth gewch chi.

Os oes gennych bartner neu bartner sifil, rhaid i chi ddweud wrth Gyllid a Thollau EM am ei hincwm hefyd, hyd yn oed os nad yw wedi newid. Y rheswm dros hyn yw oherwydd bod credyd treth wedi'i seilio ar eich incwm ar y cyd.

Newidiadau i'ch cyfeiriad neu i'ch cyfrif banc

Os na ddywedwch chi wrth Gyllid a Thollau EM am y rhain, mae'n bosib na fyddan nhw'n gallu talu i chi.

Sut i roi gwybod am newidiadau

Os ydych yn byw yng Nghymru, Lloegr neu'r Alban, gallwch gysylltu â'r llinell gymorth Credydau Treth 0845 300 3900, ffôn testun 0845 300 3909.

Os ydych chi'n byw yng Ngogledd Iwerddon, ffoniwch 0845 603 2000, ffôn testun 0845 607 6078.

Mae'r llinellau ar agor o ddydd Llun i ddydd Gwener rhwng 8.00 am a 8.00 pm.

Bydd angen ychydig bach o amser i ddiweddaru'ch manylion, felly mae'n bosib na welwch chi unrhyw newid am hyd at 36 awr.

Beth os oes newidiadau wedi bod a chithau heb roi gwybod amdanyn nhw?

Rhowch wybod am unrhyw newid cyn gynted ag y bo modd. Drwy wneud hynny, fe gewch chi'r arian iawn yn gynt, ac mae'n bosib na fydd rhaid i chi dalu dim yn ôl.

Dim ond am hyd at dri mis y gellir ôl-ddyddio cynnydd i gredydau treth, ond bydd unrhyw ostyngiad yn cael ei ôl-ddyddio i'r dyddiad pan ddigwyddodd y newid yn eich amgylchiadau.

Gwybodaeth bellach

Gallwch ffonio'r llinell gymorth Credydau Treth:

(Prydain Fawr) 0845 300 3900, ffôn testun 0845 300 3909

(Gogledd Iwerddon) 0845 603 2000, ffôn testun 0845 607 6078

Desg gymorth gwasanaethau ar-lein Cyllid a Thollau EM 0845 300 3938

Mae desg gymorth gwasanaethau ar-lein Cyllid a Thollau Em ar agor rhwng 8.00 am a 10.00 pm o ddydd Llun i ddydd Gwener a rhwng 10.00 am a 6.00 pm ar ddydd Sadwrn a dydd Sul.

Mwy o ddolenni defnyddiol

Yn yr adran hon...

Additional links

Allweddumynediad llywodraeth y DU