Gwefan llywodraeth y DU

Nodwch fod gan y wefan hon system allweddumynediad llywodraeth y DU

Gwasanaethau cyhoeddus i gyd yn un lle

Trefn llywio pennaf

Arian, treth a budd-daliadau

Arian, treth a budd-daliadau

Cynilion a Buddsoddiadau Cenedlaethol

Mae Cynilion a Buddsoddiadau Cenedlaethol (NS&I) yn cynnig ffordd gwbl ddiogel o gynilo a buddsoddi arian oherwydd caiff ei gefnogi gan Drysorlys EM. Mae rhai cynlluniau'n talu llog sy'n drethadwy, tra bo eraill yn ddi-dreth. Does dim llog i'w gael ar Fondiau Premiwm ond gallwch ennill gwobrau sy'n ddi-dreth.

Beth yw 'Cynilion a Buddsoddiadau Cenedlaethol'

Mae unrhyw beth y byddwch yn ei gynilo gydag NS&I yn ddiogel oherwydd eich bod yn benthyca arian i'r llywodraeth sy'n gwarantu y bydd yn ei ad-dalu.

Mae rhai cynlluniau 'mynediad hwylus' ar gael lle gallwch godi'ch arian unrhyw bryd. Ond mae'r rhan fwyaf o gynlluniau NS&I yn fuddsoddiadau hirdymor lle buddsoddir eich arian am un i bum mlynedd.

Mathau o gynilion NS&I

Ar hyn o bryd mae oddeutu deuddeg o gynlluniau cynilo gwahanol ar gael yn dibynnu ar:

  • eich oedran
  • faint yr ydych am ei fuddsoddi
  • am faint yr ydych am fuddsoddi

Mae nifer y cynlluniau sydd ar gael a'u manylion yn newid o bryd i'w gilydd. Gallwch gael y wybodaeth ddiweddaraf (manylion y cyfraddau llog er enghraifft) gan NS&I drwy:

  • ymweld â'u gwefan
  • eu ffonio ar 0845 964 5000, ar agor rhwng 7.00 am a hanner nos, saith niwrnod yr wythnos (byddant yn anfon taflenni atoch)
  • cael taflenni mewn swyddfa bost

Cynlluniau cynilo di-dreth

Dydych chi ddim yn talu treth ar y llog ar rai o gynlluniau cynilo NS&I. Ar hyn o bryd, dyma'r cynlluniau di-dreth:

  • Mini ISA arian - os ydych yn 16 oed neu fwy gallwch fuddsoddi rhwng £10 a £3,000 ymhob blwyddyn dreth
  • Tystysgrifau Cynilo Mynegrifol a Llog Sefydlog - gallwch fuddsoddi rhwng £100 a £15,000 am ddwy, am dair neu am bum mlynedd os ydych yn saith oed neu fwy
  • Bondiau Bonws Plant - gallwch fuddsoddi rhwng £25 a £3,000 am bum mlynedd ar gyfer unrhyw un o dan 16 a chael llog wedi'i warantu a bonws

Bondiau Premiwm

Os ydych yn prynu Bondiau Premiwm, fyddwch chi ddim yn cael llog, ond gallwch ennill gwobrau di-dreth. Rydych yn cael rhif unigryw ar gyfer bob £1 yr ydych yn ei fuddsoddi ac os dewisir y rhifau hyn yn y gystadleuaeth fisol, byddwch yn ennill gwobr.

Mae'r prisiau'n amrywio rhwng £50 a £1m. Rhaid i chi fod yn 16 oed o leiaf i brynu Bondiau Premiwm. Ond gall rhieni a neiniau/teidiau eu prynu ar ran plant o dan 16. Rhaid i chi brynu gwerth £100 o leiaf (£50 pan fyddwch yn eu prynu gydag archeb sefydlog fisol) ac allwch chi ddim cael gwerth mwy na £30,000.

Cynlluniau cynilo trethadwy

Rhaid i chi dalu treth ar y llog ar rai o gynlluniau cynilo NS&I. Gan amlaf, telir y llog heb i dreth gael ei didynnu ohono. Felly, os nad ydych yn talu treth, ychwanegir swm llawn y llog at eich cynilion. Does dim rhaid i chi lenwi ffurflen Cyllid y Wlad na hawlio treth yn ôl.

Mae sawl cynllun cynilo trethadwy ar gael, megis:

  • Bondiau Incwm - maent yn talu incwm misol sy'n amrywio gyda newidiadau yn y cyfraddau llog
  • Bondiau Cynilo Cyfradd Sefydlog - maent yn talu llog ar gyfradd sefydlog pan fyddwch yn buddsoddi
  • Bondiau Incwm Gwarantedig i Bensiynwyr - yn talu incwm misol wedi'i warantu am gyfnod y buddsoddiad
  • Bondiau Cyfalaf - yn talu cyfraddau llog gwarantedig sy'n codi bob blwyddyn dros bum mlynedd
  • cyfrifon cynilo - mynediad hwylus i'ch arian yn syth neu ar ôl rhoi rhybudd o fis

Mae llawer o'r cynlluniau am gyfnod penodol ac felly byddwch yn cael llai o log os tynnwch yr arian o'r cynllun yn gynnar

Pwy sy'n gallu buddsoddi yng nghynlluniau Cynilion Cenedlaethol?

Mae terfynau oed gwahanol ar gyfer buddsoddi ymhob un o'r cynlluniau cynilo - fel arfer yn dechrau'n 7 oed neu'n 16 oed. Mae rhai cynlluniau dim ond ar gael i grwpiau oed penodol:

  • Bondiau Bonws Plant - gellir eu prynu i unrhyw un o dan 16
  • Bondiau Incwm Gwarantedig i Bensiynwyr - gellir eu prynu gan unrhyw un sy'n 60 oed neu'n fwy

Er mwyn buddsoddi mewn mini ISA arian, rhaid i chi fod yn drethdalwr yn y DU.

Help i ddewis cynllun

Gall llinell gymorth NS&I esbonio'u cynlluniau cynilo er mwyn eich helpu i benderfynu pa un fydd orau i chi. Gallwch gael manylion pob cynllun drwy ofyn am lyfryn neu ymweld â gwefan NS&I - sydd ag arf 'help i benderfynu' ar-lein.

Agor cyfrif

Gallwch agor cyfrif neu fuddsoddi:

  • yn bersonol - mewn swyddfeydd post gyda gwasanaeth cownter
  • ar-lein - gallwch brynu rhai cynnyrch a thalu amdanynt ar-lein, megis Bondiau Premiwm a mini ISAs arian
  • drwy'r post

Gallwch ffonio llinell gymorth NS&I ar 0845 964 5000, rhwng 7.00 am a hanner nos, saith niwrnod yr wythnos.

Mwy o ddolenni defnyddiol

Yn yr adran hon...

Additional links

Allweddumynediad llywodraeth y DU