Gwefan llywodraeth y DU

Pa mor ddiogel yw'ch cartref?

Drwy gymryd ychydig o gamau syml i wella diogelwch eich cartref, gallwch leihau'n sylweddol y risg y bydd rhywun yn dwyn o'ch cartref. Oeddech chi'n sylweddoli bod 35% o achosion o fyrgleriaeth yn cynnwys ffenestr neu ddrws heb ei gloi? Gall cloi a chuddio eitemau gwerthfawr wneud gwahaniaeth.

Yn wir, gall unrhyw beth o drwch eich drysau i gryfder eich cloeon benderfynu a fydd rhywun yn dwyn o'ch cartref ai peidio. Oes arnoch eisiau gwybod pa mor ddiogel yw'ch cartref? Gallwch ddefnyddio cerdyn sgorio ar-lein i ganfod pa mor ddiogel ydyw.

• Diogelwch y cartref - cerdyn sgorio Opens new window

Gwarchod y Gymdogaeth

Mae Gwarchod y Gymdogaeth (a elwir yn Gwarchod y Cartref mewn rhai ardaloedd) yn un o'r cynlluniau atal troseddu ehangaf a mwyaf adnabyddus. Gall unrhyw un gymryd rhan mewn cynllun Gwarchod y Gymdogaeth. Mae'r cynlluniau'n galluogi pobl leol i helpu'r heddlu i leihau troseddu. Maent hefyd yn annog pobl i fod yn gymdogion da, ac yn dod â chymunedau'n nes at ei gilydd.

Sut mae'r cynlluniau'n gweithio

Arweinir pob cynllun gan gydlynydd gwirfoddol sy'n dod â'i gymdogion at ei gilydd i drafod sut y gallant wneud eu cymdogaeth yn lle mwy diogel i fyw. Gall y cynlluniau fod yn fawr neu'n fach - mae'n dibynnu ar yr ardal a beth yw dymuniadau'r bobl sy'n byw yno. Maent yn cadw cysylltiad agos â'r heddlu lleol i rannu gwybodaeth a chyngor.

Beth all cynlluniau Gwarchod y Gymdogaeth ei wneud?

Gall cynlluniau dargedu problemau troseddu lleol a chymryd camau i'w hatal. Dylai cynlluniau holi pobl leol beth sy'n eu poeni fwyaf, a chanolbwyntio ar broblem benodol.

Gellir cymryd camau allweddol tuag at dargedu a lleihau troseddu a'r ofn ynghylch troseddu mewn unrhyw ardal. Drwy ymgynghori â'r heddlu lleol, gall cynlluniau Gwarchod y Gymdogaeth:

• greu darlun clir o droseddu yn lleol
• cynnal arolwg 'ofn ynghylch troseddu'
• targedu troseddau y gall eu cynlluniau gael effaith wirioneddol arnynt
• dynodi'r cyfleoedd i droseddu yn yr ardal
• cynllunio sut i fynd i'r afael â’r broblem
• defnyddio'r cynllun i rwystro neu leihau'r cyfleoedd i droseddwyr

Yn y gorffennol, bu gweithgarwch Gwarchod y Gymdogaeth yn canolbwyntio ar gartrefi, gydag aelodau'n wyliadwrus o unrhyw beth amheus, ac yn helpu eu cymdogion fel bo'r galw. Fodd bynnag, mae mwy a mwy o gynlluniau'n ehangu'r gwaith a wneir. Bellach, gellir targedu problemau lleol, megis fandaliaeth neu graffiti, gan gynlluniau sydd wedi eu trefnu'n dda.

Cymryd rhan

Cewch fwy o wybodaeth am sut i gymryd rhan mewn cynllun Gwarchod y Gymdogaeth ar wefan Rhwydwaith Gwarchod y Cartref a'r Gymdogaeth, neu gallwch ymweld â'ch gorsaf heddlu leol i ofyn am fwy o wybodaeth.

• Gwarchod y Gymdogaeth Opens new window